„Ich sog eana mal wos: i hob des ganze Schloss in meim Leaben scho mindestens dausendmol gesaugt und nausgfegt, da kommd was zsamm, in fufzeha Johr. Und ich kann eana sogen, dia Leid dia san di gröschde Drecksschweine! Dia Bsucher habn mehrfach ihre Notdurft in den königlichen Gemächern verrichtet. Ham in die Ecken gschissen, auf gud Deutsch! Dia Schlimsten san die Dänen, dann die Franzosen und dann kimmt aba lang nix. Dia Japoner, die sann harmlos, des san bloß viele. Die hams aba au imma eilig! Und dia friern ganz gottserbärmlich. Mei is deana immer koild! Des missens sich amol vorstoillen, im Winta, do is net richtig gheizt aufm Schloss und da is au nix los, do host dann a Führung mit drei Japonan und zwoa Dänen und die friern so vor sich dahin, wärend du dei Führung mochst, auf Englisch, koana verstoat a Word, aber dia Japoner, die nicken dia ganze Zeit freindlich, wanns ned mit de Zähn klappern duan. Dia Japoner die friern derordig, das es deana die gonzen Bilder verwackld beim fotografieren. Die Englische Führung, die kon i heid no auswenig! Lieg i dahom im Bed und konn net schloafen, no sog i mir immer selber ausm Kopf mei Englische Führung auf. Und wissens wos? I bin no ned im Königssaal ankimme und schlof scho! Da brauchst koa Schafe ned! Des Schloss selbst is jo a Wahnsinn. Die Leid sogen immer des is a riesen Kitsch! I find net. Wan i mir a Schloss bauen kinnt, grad wies mir possd, des dat genau sooo ausschaun! Wunderschön! Des is ja baud worn, zeidgleich mid den ersten Woikenkratzern in New York! Des is jo im Grunde a nigelnagelneies Schloss! Mir hams sogar a Fußbodenheizung. Dia is bloß ned auf japonische Fieas eingsteuild,hoho. Und dia Küchen! Mei, des mist Sie ja scho schtoark intressiern, sie kochens ja auch beruflich hob i midkriagt. Dia Küchen is a Traum. Aber kocht hom dia da nia gud, weil der König, der hota ja so schlechte Zähn ghabt, der hod nix essen könn, als wie a Brei. Wann der Ludwig Bsuach ghobt hod, hom die a ganzes Brei-Menü gessen, sechs Gänge. Ois püriert. Na, des wär nix für mi. Wann sie da nacherd nauf gehen, no duns ma an Gfoillen, sogans net sie täten zum Kini gean. Koa Bayer tät jemals Kini sogan, des is a Respektlosigkeid sondergleichen, sogans bittschön sie gean zum König und dann schauens sich des Schloss mol genau o, des is a Traum, i sog imma, wan i mir a Schloss bauen könnt, grad wies mir possd, des dat genau so ausschaun!“